تازہ ترین
Home / Tag Archives: PIA

Tag Archives: PIA

نجکاری کے خلاف احتجاج کے دوران لاپتہ ہونے والے پی آئی اے کے 4 ملازمین بازیاب

447465-piaprotest-1454909772-976-640x480

کراچی: قومی ایئر لائن کی نجکاری کے خلاف 2 فروری کو جناح انٹر نیشنل ایئرپورٹ پر احتجاج کے دوران لاپتہ ہونے والے پی آئی اے کے 4 ملازمین کو نامعلوم افراد خود ہی چھوڑ گئے ہیں۔جیو پاکستان کے مطابق ہدایت اللہ، منصور، ضمیر چانڈیو اور سیف اللہ نامی چاروں افراد 2 فروری کو احتجاج کے دوران لاپتہ ہوئے تھے، نامعلوم افراد ان چاروں ملازمین کو ناگن چورنگی کے قریب مختلف مقامات پر چھوڑ گئے جہاں سے وہ اپنے اپنے گھروں کو چلے گئے۔
بازیاب ہونے والے افراد کا کہنا ہے کہ انہیں اٹھانے والے افراد نے نقاب پہنے ہوئے تھے اس کے علاوہ چار روز تک ان کی آنکھوں پر پٹیاں باندھی گئی تھیں جس کی وجہ سے وہ انہیں اٹھانے والوں کو پہچان نہیں سکتے۔ دوسری جانب پولیس کا کہنا ہے کہ پی آئی اے ملازمین کے اغوا کاروں کا سراغ لگانے کی کوشش کی جا رہی ہے۔
واضح رہے کہ پی آئی اے ملازمین کی جوائنٹ ایکشن کمیٹی نے حکومت کو ملازمین کی بازیابی کے لئےآج دوپہر تک کا الٹی میٹم دیا تھا، بصورت دیگر ایئرپورٹ کے جناح ٹرمینل تک مارچ کرنے کی دھمکی دی تھی۔

پالپا کی فلائٹ آپریشن بحالی کیلئے جوائنٹ ایکشن کمیٹی کو ڈیڈ لائن

446215-shotsfiredatpiaplanenearpeshawarairport-1454736648-654-640x480

کراچی: پاکستان ایئرلائن پائلٹس ایسوسی ایشن نے پی آئی اے کی جوائنٹ ایکشن کمیٹی کو فلائٹ آپریشن آج ہی بحال کرنے کی ڈیڈ لائن دے دی ہے۔
پالپا نے پی آئی اے کی جوائنٹ ایکشن کمیٹی کو آج ہی فلائٹ آپریشن بحال کرنے کی ڈیڈ لائن دیتے ہوئے کہا ہے کہ پی آئی اے اور مسافروں کا مزید نقصان برداشت نہیں کر سکتے، 3 دن کا سوگ مکمل ہو چکا، پائلٹس اب کام پر جائیں گے۔ پالپا حکام کا کہنا ہے کہ اگر حکومت کی جانب سے سیکیورٹی کی یقین دہانی کرائی گئی تو فلائٹ آپریشن بحال کردیں گے۔
دوسری جانب پالپا کے صدر عامر ہاشمی کا ایکسپریس نیوز سے بات کرتے ہوئے کہنا تھا کہ پالپا نے جب کبھی بھی ہڑتال کی تو قوائد و ضوابط کو مد نظر رکھا، جس روز پی آئی اے کا فلائٹ آپریشن بند ہوا اس روز بھی دوپہر 2 بجے تک تمام فلائٹس معمول کے مطابق اڑائی گئیں۔ عامر ہاشمی کا کہنا تھا کہ فلائٹ آپریشن بند کرنے کے نہ پہلے حق میں تھے اور نہ اب ہیں، ہمیں ہڑتال پر جانے کے لئے جان سے مارنے کی دھمکیاں دی گئیں اور کہا گیا کہ اگر پالپا نے ہڑتال نہ کی تو پائلٹس کے ٹکڑے کر دیں گے۔
دھمکی دینے والے لوگوں سے متعلق پوچھے گئے سوال پر عامر ہاشمی کا کہنا تھا کہ جن لوگوں نے ہڑتال کیلئے مجبور کیا انھی لوگوں نے دھمکیاں بھی دیں، میرے پاس تمام دھمکیاں ریکارڈ کی صورت میں موجود ہیں، اس حوالے سے وزیراعظم نواز شریف کو خط لکھ چکا ہوں جب کہ تمام ثبوتوں کے ساتھ جلد مقدمہ بھی درج کراو¿ں گا۔
پی آئی اے کی جوائنٹ ایکشن کمیٹی کے ملازمین کی ہڑتال 13 ویں روز میں داخل ہو چکی ہے جب کہ قومی ایئر لائن کا فلائٹ آپریشن مسلسل پانچویں روز بھی مکمل طور پر معطل ہے اور ملک بھر کے کسی بھی ایئرپورٹ سے پی آئی اے کی کوئی بھی فلائٹ اڑان نہ بھر سکی۔
گزشتہ روز وفاقی وزیر برائے نجکاری ذبیر عمر اور پی آئی اے کی جوائنٹ ایکشن کمیٹی کے درمیان بھی ہڑتال ختم کرنے اور فلائٹ آپریشن کی بحالی کے لئے مذاکرات ہوئے جو بغیر کسی نتیجے کے ختم ہو گئے۔ وفاقی وزیر ذبیر عمر کا کہنا تھا کہ جوائنٹ ایکشن کمیٹی ہڑتال ختم کرے تو مذاکرات ہوں گے جب کہ سہیل بلوچ کا کہنا تھا کہ حکومت جب تک ہمارے مطالبات نہیں مانتی تو اس وقت تک ہڑتال جاری رہے گی۔

پی آئی اے میں لازمی سروس ایکٹ لاگو کردیا گیا

443324-shotsfiredatpiaplanenearpeshawarairport-1454327588-683-640x480

اسلام آباد: وزیراعظم نوازشریف نے پی آئی اے میں لازمی سروس ایکٹ 1952 نافذ کرنے کی منظوری دے دی جس کے تحت غیر حاضر اور احتجاج کرنے والے ملازمین کو فوری برطرف کیا جاسکے گا۔
ایکسپریس نیوز کے مطابق وزیراعظم نوازشریف نے سول ایوی ایشن ڈویڑن کی سمری کی منظوری دے دی جس کے بعد پی آئی اے میں لازمی سروس ایکٹ 1952 لاگو کردیا گیا ہے، لازمی سروس ایکٹ 6 ماہ کے لیے نافذ کیا گیا ہے۔ لازمی سروس ایکٹ کے تحت ملازمین اب ہڑتال نہیں کرسکیں گے جب کہ دوران سروس کوئی بھی ملازم غیر حاضر نہیں رہ سکتا۔ ایکٹ کے تحت دفاتر کی تالابندی کرنے والے اور ملازمت سے غیرحاضری یا احتجاج پر فوری برطرفی ہو سکے گی۔
دوسری جانب چیرمین جوائنٹ ایکشن کمیٹی سہیل بلوچ نے کہا ہے کہ یقین نہیں آرہا کہ لازمی سروس لاگو کردیا گیا ہے لیکن اگر ایسا کیا گیا ہے تو اس سے احتجاج نہیں روکا جاسکتا، احتجاج شیڈول کے مطابق کیا جائے گا۔ انہوں نے کہا کہ ہم چاہتے توآج شام بھی فلائٹ آپریشن روک سکتے تھے، مگر ایسا نہیں کیا جب کہ حکومت مذاکرات اور بات چیت کے ذریعے مسئلہ حل کرے اور اگر لاٹھی چارج یا کوئی اورکارروائی کی گئی تو ہم اس کے لیے تیار ہیں۔
اس سے قبل پی آئی اے کی جوائنٹ ایکشن کمیٹی نے ادارے کی مجوزی نجکاری کے خلاف 2 فروری کے بجائے آج سے ہی فلائٹ آپریشن روکنے کا فیصلہ کیا تھا، جس پر سول ایوی ایشن ڈویڑن نے حالات کی سنگینی کو دیکھتے ہوئے سیکشن 10 لگانے کے لئے وزارت داخلہ کو خط لکھا تھا۔
واضح رہے کہ حکومت کی جانب سے پی آئی اے کی ممکنہ نجکاری کے خلاف جوائنٹ ایکشن کمیٹی سراپا احتجاج ہے اور اس حوالے سے حکومت اور پی آئی اے یونین کے درمیان مذاکرات بھی ہوئے تاہم کوئی خاطر خواہ نتیجہ سامنے نہ آنے پر ملازمین کی ہڑتال جاری ہے۔

پی آئی اے جوائنٹ ایکشن کمیٹی کا 2 فروری سے فلائٹ آپریشن بند کرنے کا اعلان

442697-PIA-1454247452-867-640x480

کراچی: پی آئی اے کی جوائنٹ ایکشن کمیٹی نے اعلان کردہ احتجاج پر عملدرآمد کرتے ہوئے 2 فروری بروز منگل سے فلائٹ آپریشن بھی بند کرنے کا فیصلہ کیا ہے۔پی آئی اے جوائنٹ ایکشن کمیٹی کے اجلاس کے دوران فیصلہ کیا گیا کہ پی آئی اے کی ممکنہ نجکاری کسی بھی صورت قابل قبول نہیں اوراپنے مطالبات پر قائم رہتے ہوئے منگل کی صبح 7 بجے سے فلائٹ آپریشن کو بند کردیا جائے گا۔ اجلاس میں کہا گیا کہ حکومت قومی اسمبلی میں پی آئی اے کی نجکاری سے متعلق بل واپس لے اور جوائنٹ کمیٹی کے ذمہ داران پر قائم مقدمات فوری ختم کئے جائیں،جوائنٹ ایکشن کمیٹی کا کہنا تھا کہ اگرحکومت سے کوئی بھی معاہدہ ہوگا تو وہ تحریری شکل میں ہوگا تاہم کمیٹی کے ساتھ جس نے بھی مذاکرات کرنا ہیں تو ہمارے دروازے کھلے ہیں۔
ایکشن کمیٹی کا کہنا تھا کہ اگر حکومت ریلوے کو خواجہ سعد رفیق جیسا وزیردے سکتی ہے تو پی آئی اے میں کیوں نہیں دے سکتی، پی آئی اے کو بھی خواجہ سعد جیسا وزیردیں اور پھر دیکھیں کے یہ ادارہ ایک سال میں کس طرح اپنے پیروں پر کھڑا ہوتا ہے۔

پنجاب اور خیبر پختونخوا میں دھند، 3 ایئرپورٹس پر فلائٹ ایمرجنسی نافذ

438337-AirportFogWeb-1453637007-981-640x480

اسلام آباد: پنجاب اور خیبر پختونخوا کے بیشتر علاقوں میں شدید دھند کا راج برقرار ہے جس کے پیش نظر پی آئی اے نے 3 ایئرپورٹس پر فلائٹ ایمرجنسی نافذ کردی ہے۔پنجاب، خیبر پختونخوا اور آزاد کشمیر کے بیشتر علاقے شدید دھند کی لپیٹ میں ہیں جس کی وجہ سے جہاں عوام کو مشکلات کا سامنا کرنا پڑ رہا ہے وہیں ذرائع آمدو رفت بھی بری طرح متاثر ہوئے ہیں۔ اسلام آباد کے بے نظیر انٹرنیشنل ایئر پورٹ پر صرف ایک دن میں قومی ائر لائن کی اندرون اور بیرون ملک 6 پروازیں منسوخ 39 پروازیں تاخیر کا شکار ہوئیں، دھند میں کمی کے باعث 13 گھنٹے بعد اسلام آباد ایئرپورٹ پر پروازوں کی آمد ورفت بحال ہوئی تاہم پشاور کے باچا خان ایئرپورٹ اور ملتان ایئرپورٹ پر فلائٹ آپریشن مکمل طور پر بند ہے۔دھند کی صورت حال کو دیکھتے ہوئے پی آئی اے نے اسلام آباد، پشاور اور ملتان ایئرپورٹس پر آئندہ 3 روز کے لئے فلائٹ ایمرجنسی نافذ کردی ہے۔ ترجمان پی آئی اے دانیال گیلانی کا کہنا ہے کہ قومی ایئر لائن کے مسافر زحمت سے بچنے کے لئے پروازوں کی روانگی سے متعلق مکمل معلومات حاصل کرنے کے بعد ایئرپورٹ پر آئیں۔